ನಮ್ಮ ಅಪ್ಪುನ ‘ಮಾಸ್ಟರ್​ ಪೀಸ್’ ಎಂದ ಬಾಹುಬಲಿ ಖ್ಯಾತಿಯ ಪ್ರಭಾಸ್​

ಟಾಲಿವುಡ್​ ಸ್ಟಾರ್​ ನಟ ಪ್ರಭಾಸ್​, ಪುನೀತ್​ ರಾಜ್​ ಕುಮಾರ್​ ಅಭಿನಯದ ‘ಜೇಮ್ಸ್’​ ಚಿತ್ರದ ಟೀಸರ್​ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ​ ಪುನೀತ್​ ರಾಜ್​ ಕುಮಾರ್​ ಹೀರೋ ಆಗಿ ಅಭಿನಯಿಸಿರುವ ಕೊನೆಯ ಸಿನಿಮಾ ‘ಜೇಮ್ಸ್’​ ಚಿತ್ರದ ಟೀಸರ್​ ನಿನ್ನೆಯಷ್ಟೇ ಬಿಡುಗಡೆಯಾಗಿದ್ದು, ದೇಶಾದ್ಯಂತ ಸಂಚಲನ ಸೃಷ್ಟಿಸಿದೆ.

ಪರಭಾಷೆಗಳಲ್ಲೂ ಜೇಮ್ಸ್​ ಹವಾ ಜೋರಾಗಿದ್ದು, ಟೀಸರ್​ ರಿಲೀಸ್​ ಆದ 24 ಗಂಟೆಗಳಲ್ಲಿ 1 ಕೋಟಿ ವೀಕ್ಷಣೆ ಪಡೆದಿದೆ. ಬೇರೆ ಚಿತ್ರರಂಗದ ನಾಯಕರೆಲ್ಲ ‘ಜೇಮ್ಸ್​’ ಟೀಸರ್​ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದು, ಪ್ರಭಾಸ್​ ಅವರು ಕೂಡ ಜೇಮ್ಸ್​ ಟೀಸರ್​ ಕಂಡು ಫಿದಾ ಆಗಿದ್ದಾರೆ.

‘ಜೇಮ್ಸ್​’ ಚಿತ್ರದ ಟೀಸರ್​ ಅನ್ನು ಪ್ರಭಾಸ್​ ತಮ್ಮ ಸೋಶಿಯಲ್​ ಮೀಡಿಯಾದಲ್ಲಿ ಶೇರ್​ ಮಾಡಿ ಜೇಮ್ಸ್ ಸಿನಿಮಾ ಮಾಸ್ಟರ್ ಪೀಸ್​ ಸಿನಿಮಾವಾಗುತ್ತೆ ಎಂಬುದನ್ನು ನಾನು ಖಾತ್ರಿ ಪಡಿಸುತ್ತೇನೆ. ಪವರ್​ ಸ್ಟಾರ್ ಪುನೀತ್​ ರಾಜ್​ ಕುಮಾರ್​ ಅವರನ್ನು ಇಷ್ಟಪಡುವ ಕೋಟ್ಯಂತರ ಜನರಿಗೆ ಈ ಸಿನಿಮಾ ವಿಶೇಷವಾಗಿರುತ್ತದೆ. ವಿ ಮಿಸ್​ ಯೂ ಅಂತ ಪ್ರಭಾಸ್​ ಬರೆದುಕೊಂಡಿದ್ದಾರೆ.

ಕನ್ನಡ ಮಾತ್ರವಲ್ಲದೆ ತೆಲುಗು, ತಮಿಳು , ಹಿಂದಿ ಹಾಗೂ ಮಲಯಾಳಂನಲ್ಲೂ ಜೇಮ್ಸ್​ ಟೀಸರ್​ಗೆ ಒಳ್ಳೆ ರೆಸ್ಪಾನ್ಸ್‌ ಸಿಕ್ಕಿದೆ. ಇಡೀ ಭಾರತೀಯ ಚಿತ್ರರಂಗವೇ ಜೇಮ್ಸ್​ ಚಿತ್ರದ ಮೇಲೆ ಭಾರಿ ನಿರೀಕ್ಷೆಯನ್ನು ಇಟ್ಟುಕೊಂಡಿದೆ. ಮುಂದಿನ ತಿಂಗಳು ಪುನೀತ್​ ಹುಟ್ಟು ಹಬ್ಬದ ದಿನ ಅಂದ್ರೆ ಮಾರ್ಚ್​ 17 ರಂದು ಐದು ಭಾಷೆಗಳಲ್ಲಿ ಜೇಮ್ಸ್​ ಚಿತ್ರ ಬಿಡುಗಡೆಯಾಗುತ್ತಿದೆ.